शहराच्या मध्यवर्ती भागातील वाहतूक कोंडी सोडवण्यासाठी शनिवारवाडा ते स्वारगेट आणि सारसबाग ते शनिवारवाडा हे दोन भुयारी मार्ग तयार करण्यासाठी कसबा मतदारसंघाचे आमदार हेमंत रासने यांच्याकडून पाठपुरावा केला जात आहे. प्रकल्पाच्या मंजुरीसाठी त्यांनी सार्वजनिक बांधकाम मंत्री शिवेंद्रसिंहराजे भोसले यांची भेट घेऊन अधिकाऱ्यांची तातडीने बैठक घेण्याची मागणी केली आहे.
शहराच्या मध्यवर्ती भागात ऐतिहासिक स्थळे, धार्मिक केंद्रे आणि प्रमुख बाजारपेठा असल्याने येथे दररोज हजारो नागरिक ये-जा करतात. परिणामी, वाहतूक कोंडी हा मोठा प्रश्न निर्माण झाला आहे. प्रस्तावित भुयारी मार्ग हे या समस्येवर कायमस्वरूपी तोडगा ठरणार असून, पुणेकरांसाठी मोठा बदल घडवून आणतील.
या प्रकल्पाच्या मंजुरीसाठी तातडीने बैठक आयोजित करण्याची मागणी रासने यांनी सार्वजनिक बांधकाम मंत्र्यांकडे केली. त्यावर सकारात्मक प्रतिसाद देत, पुढील आठवड्यात संबंधित अधिकाऱ्यांची बैठक घेण्याचे आश्वासन मंत्री भोसले यांनी दिले. तसेच, हा प्रकल्प लवकरच मार्गी लागेल यासाठी शासनस्तरावर सर्वतोपरी सहकार्य केले जाईल, असेही त्यांनी सांगितल्याची माहिती रासने यांनी दिली आहे.
दरम्यान, खडक येथील रखडलेल्या मामलेदार कचेरीच्या कामाला वेग देण्याची मागणीही यावेळी करण्यात आली. याशिवाय, राज्याचे गृहराज्यमंत्री योगेश कदम यांचीही अधिवेशनाच्या दरम्यान भेट घेऊन खडकमाळ येथील पोलिस वसाहतीतील जीर्ण इमारतींच्या पुनर्बांधणीसाठी मागणी केल्याचं हेमंत रासने म्हणाले.
