विरेश आंधळकर, पुणे : शहरात जीबीएस (गुइलेन बॅरी सिंड्रोम) या दुर्मिळ आजाराने धोक्याची घंटा वाजवली आहे. आतापर्यंत जवळपास ५८ रुग्ण आढळले असून, सिंहगड रोड परिसरातील नांदेड गाव, किरकटवाडी आणि धायरी भागात या आजाराचा सर्वाधिक प्रादुर्भाव झाल्याने नागरिकांमध्ये चिंतेचे वातावरण आहे. या पार्श्वभूमीवर महापालिका आयुक्त राजेंद्र भोसले यांनी आज नांदेड गावात पाहणी केली. या भागामध्ये कोणतेही शुद्धीकरण न करता केला जाणारा पाणीपुरवठा या आजारासाठी निमंत्रण ठरल्याचा दावा स्थानिकांकडून केला जात आहे.
तज्ज्ञ डॉक्टरांच्या मते, दूषित पाणी पिल्यामुळे या आजाराची लागण होते. नांदेड गावातील ४०-५० वर्षांपूर्वी बांधण्यात आलेली जुनी विहीर या भागातील पाण्याचा मुख्य स्रोत असून खडकवासला धरणातून कोणतेही शुद्धीकरण न करता पाणी थेट विहिरीत टाकले जाते. महापालिकेकडून क्लोरीन टाकून पाणी शुद्ध करण्याचा दावा केला जात आहे. मात्र, स्थानिक नागरिक याबाबत समाधानी नसून पाणी दूषित येत असल्याची तक्रार करत आहेत. विशेष म्हणजे तीन वर्षांपूर्वी नांदेड गाव, किरकटवाडी नांदोशी या परिसराचा समावेश पुणे महापालिकेत झाला असला, तरी अद्याप जलशुद्धीकरण केंद्र उभारण्यात आलेले नाही. दूषित पाणी पुरवठ्यामुळे नागरिकांना आजाराची लागण होत आहे.
महापालिकेत नव्याने समाविष्ट गावांमध्ये मूलभूत सुविधांच्या उभारणीसाठी निधी उपलब्ध करून देण्यात यंत्रणा कमी पडत आहेत. त्यामुळे अनेक विकासकामे रखडली असून त्याचा फटका थेट स्थानिक नागरिकांना बसत आहे. स्थानिक रहिवाशांनी प्रशासनाकडे तातडीने जलशुद्धीकरण प्रकल्प हाती घेण्याची मागणी केली आहे. दरम्यान, आज निर्माण झालेल्या परिस्थितीला महापालिका तसेच राज्य सरकार जबाबदार असल्याची तक्रार नागरिकांकडून केली जात आहे. एवढे होऊनही प्रशासनाने त्वरित उपाययोजना न केल्यास भविष्यात आणखीन परिस्थिती गंभीर होऊ शकते.
महत्वाच्या बातम्या-
-आधी बंद दाराआड चर्चा अन् नंतर शेजारी बसणं टाळलं; पवार काका-पुतण्याच्या मनात नेमकं काय?
-Pune News: लवकर श्रीमंत व्हायचं म्हणून त्याने राजस्थानमधून अफू आणलं अन्…
-पुण्यात ‘GBS’ची रुग्णसंख्या वाढली, आमदार रासनेंची पालिका प्रशासनाकडे तातडीच्या उपाययोजनांची मागणी
-पुण्यात ‘GBS’ ची वाढती रुग्णसंख्या; राज्य सरकारने उचललं ‘हे’ मोठं पाऊल
