पुणे : देशात भोंदूगिरीचे प्रकार काही कमी घडले नाहीत. पाप, पुण्य, धर्म या सर्व गोष्टी फक्त गरिबांनाच प्रभावित करतात, असं नाही. तरी पुण्यातील एका डॉक्टर असलेल्या व्यक्ती देखील या भोंदूगिरीला बळी पडल्याचा धक्कादायक प्रकार उघडकीस आला आहे. शहरातील कोंढवा परिसरात एका डॉक्टरला काही संधीसाधू आणि भोंदू लोकांनी पुण्य कर्माद्वारे स्वर्गप्राप्ती करून देतो, असे सांगून तब्बल ५ कोटी ३८ लाख रुपयांना गंडा घातल्याचा प्रकार उघडकीस आला आहे.
याप्रकरणी एका ६७ वर्षीय डॉक्टरने कोंढवा पोलीस ठाण्यात तक्रार दिली आहे. तक्रार करणारा व्यक्ती हा शहरातील डॉक्टर आहे. डॉ. अहमद अली इनाम अली कुरेशी (एन. आय. बी. एम. रोड कोंढवा, पुणे) यांनी फिर्याद दिली आहे. याप्रकरणी सादिक अब्दुलमजीद शेख, यास्मिन सादिक शेख, एहतेशाम सादिक शेख, अम्मार सादिक शेख, राज आढाव ऊर्फ नरसू यांच्याविरुद्ध फसवणूक, तसेच अपहार केल्याप्रकरणी गुन्हा दाखल करण्यात आला आहे.
तक्रारदार डॉक्टर सौदी अरेबियात ३० वर्षे वैद्यकीय व्यवसाय करत होते. त्यांनी ३ विवाह केले आहेत. सन २०१८ मध्ये ते पुण्यात वास्तव्यास आले. त्यांची पत्नी सध्या त्यांच्याबरोबर राहायला आहे. गेल्या काही दिवसांपासून डॉक्टर आणि पत्नीत वाद सुरू होता, अशी माहिती गुन्हे शाखेचे पोलीस निरीक्षक मानसिंग पाटील यांनी दिली. डॉक्टर प्रार्थनास्थळात गेले. त्या वेळी त्यांची आरोपींशी ओळख झाली. त्यानंतर कौटुंबिक वादात धार्मिक तोडग्याचे आमिष दाखवून आरोपींनी त्यांच्याकडून वेळोवेळी पैसे उकळले. तोडगा केल्यानंतर स्वर्गप्राप्ती होईल, असे आमिष दाखविले होते, असे डॉक्टरांनी दिलेल्या फिर्यादीत म्हटले आहे.
महत्वाच्या बातम्या-
-“सून म्हणून माझी निवड शरद पवारांनीच केली”; शरद पवारांच्या वक्तव्यावर सुनेत्रा पवारांची प्रतिक्रिया
-आधी अश्रू अनावर अन् आज थेट जोडले हात; शरद पवारांच्या ‘त्या’ वक्तव्यावर सुनेत्रा पवारांचं मौन कायम
