एकाच पावसात उडाली पुणेकरांची दाणादाण, शहरात पावसाने नेमकी काय परिस्थिती?

पुणे : गेल्या वर्षात तीव्र उन्हाळा आणि भीषण दुष्काळाची परिस्थिती ओढवली होती. मात्र, यंदा पावसाने दमदार हजेरी लावलेली पहायला मिळत आहे. महाराष्ट्रात पावसाला सुरवात झाली असून एक महिना संपण्यापूर्वीच वार्षिक सरासरीच्या जवळपास निम्मा पाऊस पडला आहे. शहरात गेल्या काही दिवस मुसळधार पाऊस पडत आहे. या पावसामुळे शहरात चांगलेच पाणी साचले होते. शनिवारी शिवाजीनगर येथे ११७ मिलीमीटर पावसाची नोंद झाली होती.

पुणे शहरात गेल्या अनेक वर्षांपासून जून महिन्याच्या सरासरीच्या जवळपास ६४ टक्के पाऊस एकाच दिवसात पडला होता. मात्र, या वर्षी आतापर्यंत सुमारे ३१५ मिलिमीटर पावसाची नोंद झाली आहे. गेल्या वर्षी पडलेल्या पावसामुळे पावसाळाच्या सुरवातीलाच शहरात वार्षिक पावसाची नोंंद झाली आहे.

शहरात शनिवारी सायंकाळी झालेल्या जोरदार पावसाने महापालिकेच्या कामाची पोलखोल झाली. शहराच्या अनेक भागांत पाणी तुंबण्याच्या घटना घडल्या. अनेक घरांमध्ये कंबरेपर्यंत पाणी साठले होते. त्यामुळे याचे खापर खासदार मेधा कुलकर्णी यांनी महापालिका प्रशासनावर फोडले आहे. त्याबाबतचे निवेदन मेधा कुलकर्णी यांनी महापालिका आयुक्त तथा प्रशासक डॉ. राजेंद्र भोसले यांना दिले आहे.