पुणे : पुणे शहर पोलीस दलात बेशिस्तपणा असल्याचं गेल्या काही दिवसांपासून वारंवार समोर येत आहे. वाघोली पोलीस चौकीसमोर एका तरुणाने केलेला आत्महत्येचा प्रयत्न, तसेच मगरपट्टा पोलीस चौकीत चौकशीसाठी बोलावलेल्या महिलेशी गैरवर्तन केल्याच्या घटनांमधून पुणे पोलीसांचा बेशिस्तपणा समोर आला. या बेशिस्तीला चाप लावण्यासाठी पोलीस आयुक्त अमितेश कुमार यांनी पावले उचलली आहेत.
वाघोलीतील तरुणाचा आत्महत्येचा प्रयत्न, मगपट्टा परिसरातील महिलेशी गैरवर्तन या घटनांची पोलीस आयुक्तांनी गंभीर दखल घेतली आहे. हडपसर पोलीस ठाण्याचे वरिष्ठ पोलीस निरीक्षक रवींद्र शेळके आणि हडपसर पोलीस ठाण्याचे वरिष्ठ निरीक्षक विश्वजीत काईगंडे यांनी बदली करण्याचे आदेश पोलीस आयुक्तांनी दिले. अमितेश कुमार यांनी पोलीस आयुक्तपदाची सूत्रे स्विकारल्यानंतर शहरातील गुंडांची झाडाझडती घेतली. पोलीस दलातील बेशिस्तांवर कारवाईचा इशारा त्यांनी दिला.
पोलीस दलातील वरिष्ठ अधिकाऱ्यांच्या बैठका घेऊन त्यांनी सूचना दिल्या. ललित कला केंद्रात भारतीय जनता युवा मोर्चाच्या कार्यकर्त्यांनी आंदोलन केल्यानंतर या घटनेची माहिती त्वरीत वरिष्ठांना न दिल्याने चतु:शृंगी पोलीस ठाण्यातील उपनिरीक्षकाला निलंबित करण्याचे आदेश दिले आहेत.
गुंड शरद मोहोळची पत्नी स्वाती मोहोळला धमकावल्या प्रकरणी अटकेत असणारा आरोपी मार्शल लीलाकर हा आरोपी ससून रुग्णालयातून पसार झाल्याने सायबर पोलीस ठाण्यातील दोन पोलीस कर्मचाऱ्यांना निलंबित करण्याचे आदेश देण्यात आले. मगरपट्टा पोलीस चौकीत चैाकशीसाठी ताब्यात घेतलेल्या महिलेशी गैरवर्तन केल्याप्रकरणी सहायक पोलीस निरीक्षकासह दोन महिला कर्मचाऱ्यांना निलंबित करण्याचे आदेश देण्यात आले.
महत्वाच्या बातम्या-
-महापालिका आयुक्त विक्रम कुमार यांची जगदीश मुळीकांनी घेतली भेट; शहरातील प्रश्नांसंदर्भात चर्चा
-नेता ते अभिनेता! अभिजीत बिचुकले लवकरच झळकणार चित्रपटात
-राग गेला, रुसवा हटला! राज्यसभेची उमेदवारी जाहीर झाल्यानंतर मेधा कुलकर्णी काय म्हणाल्या?
-रोहित रावसाहेब नरसिंगे दिग्दर्शित ‘अ व्हॅलेंटाईन्स डे’ चित्रपटाचा टीझर प्रदर्शित
-शरद पवार गट काँग्रेसमध्ये विलीन होण्याच्या चर्चेला पुर्णविराम; सुप्रिया सुळेंचं मोठं वक्तव्य
