पुणे : राज्यात लोकसभा निवडणुकीचे वातावरण चांगलेच तापले आहे. लोकसभेच्या तिसऱ्या टप्प्यातील मतदान हे ७ मे तर चौथ्या टप्प्यातील मतदान हे १३ मे रोजी होणार आहे. या दिवशी पुणे जिल्ह्यात येणाऱ्या सर्व आस्थापना, कारखाने, दुकान मालक, व्यवस्थापनांनी कार्यरत अधिकारी आणि कर्मचाऱ्यांना लोकसभा सार्वत्रिक निवडणूक २०२४ च्या निवडणुकीमध्ये मतदानाच्या दिवशी भरपगारी सुट्टी द्यावी, असे आदेश जिल्हाधिकारी डॉ. सुहास दिवसे यांनी दिले आहेत.
आस्थापना, निवासी हॉटेल, खाद्यगृहे, अन्य गृहे, नाट्यगृहे, व्यापार, औद्योगिक उपक्रम किंवा इतर आस्थापना, माहिती व तंत्रज्ञान कंपन्या, खरेदी केंद्रे , मॉल्स, किरकोळ विक्रेते आदी ठिकाणी कार्यरत अधिकारी, कर्मचाऱ्यांना भरपगारी सुट्टी किंवा अपवादात्मक परिस्थितीत त्यांना पूर्ण दिवस सुट्टी देणे शक्य नसल्यास त्याठिकाणी दोन ते तीन तासांची सवलत देण्यात यावी. सवलत देण्यापूर्वी संबंधित महानगरपालिका अथवा जिल्हाधिकारी यांची पूर्वपरवानगी घेण्याचे सांगण्यात आले आहे.
निवडणूकीच्या दिवशी मतदान करण्यासाठी भरपगारी सुट्टी किंवा सवलत न दिल्यास संबंधितांनी अपर कामगार आयुक्त यांचे कार्यालय, पुणे विभाग, कामगार उप आयुक्त यांचे कार्यालय, पुणे जिल्हा [email protected] किंवा [email protected] या ई-मेल पत्त्यावर किंवा विभागाचे अधीक्षक चि. भि. केंगले, यांच्या भ्रमणध्वनी क्र. ८७९६६-७५०८९ वर तक्रार दाखल करावी, असे आवाहन देखील अपर कामगार आयुक्त शैलेंद्र पोळ यांनी केले आहे.
महत्वाच्या बातम्या-
-हडपसरमध्ये आढळराव पाटलांची सरसी, रॅलीला मिळतोय अभूतपूर्व प्रतिसाद
-“होय, माझा आत्मा अस्वस्थ आहे, पण…” शरद पवारांचे मोदींना खरमरीत उत्तर
-मावळात ३३ उमेदवार निवडणुकीच्या रिंगणात; उमेदवारांच्या गर्दीमुळे निवडणूक विभागाची डोकेदुखी वाढली
-Shirur | बारामतीची पुनरावृत्ती शिरूर लोकसभेत; अमोल कोल्हेंची डोकेदुखी वाढली
