पुणे: देशभरात सध्या लोकसभा निवडणुकीचे वारे वाहत असून पुणे शहरात देखील उमेदवार कोण असणार याच्या चर्चा जोरदार सुरु आहेत. सत्ताधारी भाजपमध्ये उमेदवारीसाठी रस्सीखेच सुरु असल्याने उमेदवार कोण असेल?, याकडे सर्वांचे लक्ष लागले आहे. जगदीश मुळीक, संजय काकडे, शिवाजी मानकर, सुनिल देवधर अशी मोठमोठी नावे चर्चेत असून त्यापैकी माजी महापौर मुरलीधर मोहोळ यांचे नाव स्पर्धेत अग्रस्थानी आहे. कार्यकर्त्यांची मोठी फौज आणि दांडगा जनसंपर्क ही मोहोळांची मोठी ताकद आहे. याच मुरलीधर अण्णांसाठी आता मित्रमंडळींनी देखील ‘तेरी-मेरी यारी, लोकसभेची करू तयारी’ हा नारा देत अनोखा उपक्रम राबवला आहे.
पुणे शहरात सध्या सर्वत्र लोकसभा निवडणुकीची जोरदार तयारी सुरू आहे. चर्चेत असलेले सर्व भाजपा नेते लोकसभेचे तिकीट मिळवण्यासाठी तयारी करत आहेत. मुरलीधर मोहोळ यांनी देखील लोकसभेच्या पार्श्वभूमीवर मोर्चेबांधणीला सुरुवात केली आहे. अशातच लहानपणापासून एकत्र खाल्लं-पिल्लं, सुख-दु:खात एकमेकांना साथ देत मोठे झालो, आता आपल्या मित्राला आपल्या साथीची आवश्यकता असताना ती नि:स्वार्थपणे देण्यासाठी मुरलीधर मोहोळ यांच्या मित्रांनी पुढाकार घेत बैठकीचे आयोजन करुन मोहोळ यांना निमंत्रित करण्यात आलं होत.
यावेळी पुणे शहर आणि ग्रामीण भागातून सुमारे शेकडो मित्र एकत्र जमले. आपला मित्र खासदार झालाच पाहिजे, त्यासाठी काय काय करायचे, कुणी कोणती जबाबदारी पार पाडायची, अशा अनेक विषयांवर चर्चा झाल्या. ज्या मित्रांना प्रत्यक्षात येणे जमले नाही, त्यांनी फोनवर संपर्क साधला. शेवटी सर्वांनी मुरलीधर मोहोळ यांच्यासोबत फोटोसेशन करत जुन्या आठवणींनाही उजाळा दिला. दरम्यान मित्र परिवाराची साथ मिळाल्याने मुरलीधर मोहोळ यांचे पारडे आणखी जड झाले आहे .
