पुणे : पुण्यातील बाणेरमध्ये गुरुवारी ग्लॉस्टर गाडी चालकाने बेदरकारपणे गाडी चालवत ५ वाहनांना जोरदार धडक दिली. त्यामुळे परिसरात भितीचे वातावरण निर्माण झाले होते. त्या पार्श्वभूमीवर आज कोथरूडचे आमदार चंद्रकांत पाटील यांनी बाणेर पोलीस स्टेशनला भेट देऊन सर्व घटनेचा सविस्तर आढावा घेतला. बाणेर-बालेवाडी पाषाण सूस भागात बेदरकारपणे गाडी चालवत दहशत निर्माण करणाऱ्यांना कठोर शासन करुन जरब बसववी, असे निर्देश आमदार चंद्रकांत पाटील यांनी आज वरीष्ठ पोलीस निरीक्षक महेश बोळकोटगी यांना दिले. तसेच,नव्याने निर्माण झालेल्या बाणेर पोलीस स्टेशन हद्दीत चौक्यांचे आणि गस्त वाढवावी, अशा सूचना ही त्यांनी यावेळी पोलीस अधिकाऱ्यांना दिल्या आहेत.
यावेळी पोलीस निरीक्षक महेश बोळकोटगी यांनी घटनेची सविस्तर माहिती चंद्रकांत पाटील यांना दिली. तसेच, पुढील कारवाई सुरू असल्याचे स्पष्ट केले. त्यावर चंद्रकांत पाटलांनी पोलीस प्रशासनाने योग्य कारवाई करुन दोषींवर कठोर कारवाई करण्याच्या सूचना दिल्या. तसेच, भागाच्या सुरक्षेसाठी बेदरकारपणे गाडी चालवत दहशत निर्माण करणाऱ्या वाहनचालकांवर कठोर शासन करावे, असेही निर्देश चंद्रकांत पाटलांनी दिले आहेत.
तसेच, पुणे शहरातील टेकड्या व अन्य ब्लॅक स्पॉट सुरक्षित केले जावे, यासाठी पुणे पोलिसांकडून विशेष उपाययोजना राबवण्यात येत आहेत. शहरातील १३ पेक्षा अधिक टेकड्या आणि ७ पेक्षा अधिक ब्लॅक स्पॉट निश्चित करण्यात आले असून, संबंधित ठिकाणे सीसीटीव्ही आणि लाईट्सच्या माध्यमातून सुरक्षित केली जाणार आहे. याची कडक अंमलबजावणी करुन टेकड्या सुरक्षित करण्याचे निर्देश दिले.
शहराचा वाढता विस्तार आणि कायदा सुव्यवस्थेच्या पार्श्वभूमीवर गृह विभागाने पुणे पोलीस आयुक्तालयात ७ नवीन पोलीस ठाण्यांना मंजुरी दिली आहे. त्यासाठी सुमारे ६० कोटी रुपयांच्या निधीची तरतूद करण्यात आली आहे. यामध्ये बाणेर पोलीस स्टेशनचा ही समावेश असून ८ कोटी ६० लाखाची तरतूद करण्यात आली आहे. भविष्यातही मनुष्यबळ आणि पोलीस चौक्या वाढविण्यासाठी सर्वतोपरी मदत करण्याची ग्वाही यावेळी दिली.
परिमंडळ ४चे पोलीस उपायुक्त हिमंत जाधव, खडकी विभागाच्या पोलीस सहायक पोलीस आयुक्त अनुजा देशमाने, बाणेर शाखेच्या वाहतूक निरीक्षक श्रीमती सरोदे, बाणेर पोलीस चौकीचे सहाय्यक पोलीस निरीक्षक बाबासाहेब झरेकर, अनिल केकाण, भाजप कोथरुड उत्तरचे अध्यक्ष सचिन पाषाणकर, पुणे शहर सरचिटणीस गणेश कळमकर, प्रल्हाद सायकर, प्रकाशतात्या बालवडकर, लहू बालवडकर, सचिन दळवी, यांच्या सह सर्व पोलीस अधिकारी आणि कर्मचारी उपस्थित होते.
महत्वाच्या बातम्या-
-‘पिंपरी-चिंचवडला मंत्रिपद हवंच’; भाजप पदाधिकाऱ्यांची मागणी
-पुण्याचा पालकमंत्री कोण? चंद्रकांत पाटील म्हणाले, ‘आपल्या सगळ्याच इच्छा पुर्ण होत नाहीत’
-‘लाडकी बहीण योजनेचे २१०० नाही तर ३ हजार रुपये द्या’; सुप्रिया सुळेंची मागणी
-पुणे महापालिकेने नागरिकांच्या दारात वाजविला बँड; ४ दिवसात कोट्यावधींची वसूली
-मुख्यमंत्री असताना एकनाथ शिंदेंचा असाही रेकॉर्ड, तब्बल ४१९ कोटींची केली वैद्यकीय मदत
